صوت المرحوم مولانا حسن عبيد رحمة الله عليه واسكنه في فسيح جناته مع الصديقين والشهداء وحسن اؤلئك رفيقا 

 

 

            تلاتين سنة بتقول
           نفس الكلام منقول 

           تلاتين سنة بتوعد
          والوعد غير مفعول

          تلاتين سنة بتنهب
          في الربح والاصول 

           تلاتين سنة بتكذب 
           قايلنا   مالنا  عقول

          تلاتين سنة بتكتل   
         وتبني على المجهول

          تلاتين سنة استعباد   
          ده  أمر ما   مقبول

          تلاتين سنة صابرين
          لا حل  ولا   حلول 

           الشعب قال أرحل 
          الشعب  سيد  القول

          الطلقة  ما   بتكتل 
         بكتل  سكات  الزول

    

          أرحل كفاية عليك
          ما حد عليك مأسوف

          أسمع كلام شعبك
          يا ناقص العقل والشوف

          نحن مرقنا خلاص
          كاسرين حواجز الخوف

          ما بترهبنا رصاص  
          ولا قنابل المولوتوف

         ما بترعبنا قناصك
          أملأ  الصدر  والجوف

          شهداؤنا في الطابور 
          ألوف  وراها   ألوف

   

         الثورة ثورة كرامة
         ابدا ماهي ثورة جوع

         عشان علمنا يكون  
         بين الامم  مرفوع

         نحن مرقنا الشارع 
         قابلنا  يا  الجربوع

         ماشين خلاص قدام 
         في الثورة مافي رجوع

         لما يضوق الضار
        انت وهو لحس الكوع

        

         رئيس مصنوع صناعة 
           تركيبة  ظلام  الليل

          ما بتحكمنا يا جاهل 
           أبدا  بالثبور  والويل

          قايل الحكم سرقة 
           رقيص  وهز الذيل

            جايين عليك أركز
           ما خايفين من التكتيل

           الشايفو في الشارع
          ده الزبد الوراه السيل
          بكرة بينكتب اسمك  
         في مزبلة الحمير والخيل

       

                       صلاح مرسي

                     06/01/2019

السنوات العجاف         

   بقلم / صلاح مرسي

بيني وبينك حسن النية ...

أماني بتنبت دايماً لينا أحلام  جدية

شجر الحب الأثمر فينا ...

رغم الزمن الجائر طال ..........

وتتعداه سحابة غشيمة ....

باقية فينا جذورو  قوية....

♫   ♫       ♫    ♫

                             
  بيني وبينك مافي حواجر  

مافى فواصل مافى حدود

بين النفس الواحدة خطوط

متشابكة شواهد حية ....*

بركان يذيب جدار الوهم القابع ...

شمس البيع الرابح  طلوعها عشية ...

يبقى الليل حكاوي كبارنا......

ويضوى  الباقي من أعمارنا......

ونعيش حياتنا سلام و حرية ..

♫   ♫       ♫    ♫   

جمرة الشوق الوقد لهيبا زمان ...

ماتطفيها رياح ثلجية ......

وهج عينيك دروس في الحب ....

سطورها عروق القلب النابض

مدادها ثلوج الصيف الحارقة ....

تجرى حنان وقت نتلاقى وقت الجية

♫   ♫       ♫    ♫

رسالاتك فيها ملامحك ....

أفتش نفسي في ذاتك....

أغوص جوه الحروف سائح....

الاقيك ويسكن ألم الفراق الكان

أبث أشواقي فوق الريح ...

أمانة معاك يا قمرية.....

♫   ♫       ♫    ♫

على صوتك خلى كل الدنيا تسمع ...

قصة الريدة النمت جو أهداب  العيون ....

شاربة من دمعة فراقنا ...

جودي ياعين بالله سخية ...

♫   ♫       ♫    ♫

وصلت الدار سألت عليك ...

مجالسنا ودروبنا المحزنة...

أناديك يرجع صدى صوتي عذاب ...

أحبس في القليب ألمي ...

عيني تحدق في عيون الناس ...

تحصد سراب  آخر المطاف ....

شاخت الأيام وعدن ...

كبرت معاها جواي أذية ....

♫   ♫       ♫    ♫

من بعيد يظهر خيال ...

غيمة شايلة ريحة بلدنا ...

تترسم في الغيمة صورتك ...

رائعة زي خضرة جرفنا ...

تعالى أسكني جواي ياغيمة ...

أنتي والصورة المعاك.....

وصبى مويتك في حشاى ....

ما أظن يبرد شويه ....

♫   ♫       ♫    ♫

في غيابك أفرش الأحزان وساد....

كلما ارسم ورود القاها أشواك ....

الحلم كابوس وراك...

لا الفرحة في بعدك تدوم ....

لا الدرب واصل بي عذاب ....

لكن هواك نيرانو حية ...

♫   ♫       ♫    ♫

بكرة تهدا أمواج بحارنا .....

ونرسى في شاطئي غرامك...

يبقى مع التيار مسارنا ....

تنكسر كل الحواجز.....

ينكتب في الأزهار وصالنا ....

نعزف معاك الحان شجية .

ليك يا أغلى الحبايب ....

ليك يا وطن مليون تحية ....

♫   ♫       ♫    ♫

ما كان خيارى الغربة يوما ...

لو ما الوطن بالحيل مصاب ...

في الزمن الردى الغربة تصبح وطن ...

والوطن يشكو الخراب ..

الكل تائه في الشتات ...

الكل ضحية 

♫   ♫    ♫    ♫
  

ضحية الباعوا الضمير....
سماسرة حاكمين البلاد ...

شركات هنا  وجذر هناك ...

يتاجروا في قوت العباد...

أموال مكدسة في البطون ..

عزمونا في بعض الفتات ...

قالوا ...مهية .

♫   ♫    ♫    ♫

الفقر بوابة الوطن... سودانا فوق

أطفال بيحلموا بالمدارس ... سودانا فـــوق

يتامى مالين الشوارع ... سودانا فـــــــــوق

حق البعوض محفوظ تمام ... سودانا فـــــــوق

شعارات مالية الأفق ...

دوت الآذان دوية

♫   ♫   ♫    ♫

قالوا يموتوا  والنص يعيش ...

ونورث الربع اليعيش ...

ونشرد التمن اليعيش ...

ونجاهد باليفلت يعيش ....

ونعيش ملوك...

بلاش صداع  وبلاش رعية .

♫   ♫   ♫    ♫

مرت العشرة العجاف ....

والجنوب يغلى المضاجع ....

كل يوم يدمى المواجع ....

واحد كبيرهم قال كلام ...

قالوا يا شيخنا خير ...

منو البيقدر يقولو لا ...

ما كل شي  خنوع جماعي ....

شيخنا مد أيديه فوق ....

وهز رأسوا يمين شمال ....

يا جماعة مش الجنوب افصلوه ...

مافى داعي للحروب ....

نحن تكفينا البقية ...

رقصوا وهللوا...

يا سلام يا شيخنا....

دايما أفكارك عبقرية.

♫   ♫   ♫    ♫

رفعوا شعار الانفصال 

… فود تجى وفود تروح

يا جون تعال شيل الجنوب

كل آبار النفط عليك حلال

لكنو جون أحلامو غير...

حلمو اكبر من جنوب

داير يشوف  سودان كبير..

سودان قديم يسع الجميع...

سماه  سودانا جديد...

لا مكان للعنصرية .

♫   ♫   ♫    ♫

روجوا الفكرة اللعينة

دفنوا بذور الفتنة فينا ...

لغم بيكبر كل يوم صباح عشية .      

ما هو انزرع من زمان ...

يوم جو عملوا الانقلاب ..

 تحت نار المدفعية..

سموا  نفسهم  الانقاذ

لا أحزاب لا طائفية ...

كذبوا الكذبة الكبيرة

فاحت ريحتهم العنصرية ...

♫    ♫    ♫    ♫

بىاسم التمكين..

سرقوا المال العام..

استمتعوا بالمال الحرام ...

نهب مسلح في الطرق ...

قلعوا حق الناس قلع ....

طلعوا عين الناس بالدفع...

نفس سياسة الاستعمار....

استعبدوا الأحرار ...

كلوا بي اسم الشرع ....

بعد شبعوا خلاص....

قالوا لا للعسكرية .

       ♫    ♫  ♫    ♫

كأنك يا أبو زيد ما غزيت

لكن آذيت مليون أذية .

بقينا عايشين في حصار ...

نتيجة السياسات الغبية ...

ما حفظنا حقوق لجار

ونشكو من الجيرة الشقية ...

إرهاب ورق

من قضية آلي قضية .

♫   ♫   ♫    ♫

أم القضايا ...

نحن بنخاصم نفسنا ...

مستعربين..السواد شايفنوا عار..

دايما يسبوا الأمهات..

شايفنها أسباب البلية.

مستفرقين متمردين

ينادوا  بالحق القديم..

فهموا  الدرس   متاخرين..

وشالوا  السلاح...

ما   الحق  تصونه   البندقية.

♫   ♫    ♫    ♫

قلنا عرب قالوا لا ...

روحوا مننا غادى غادى..

كوسوا ليكم عن هوية .

أفارقة كمان..بيقولوا..لا

انتو ما بتشبهونا..

انتو نبته جهنمية

♫   ♫   ♫    ♫

اسمعوا يا سجم يا رماد

نحن ما عاملين جنية

اسألوا التاريخ عنا

في مروى كوشة..

والبجراوية.

اسألوا التاريخ عن..

اسود المهدية.

نحن امتنا عظيمة ..

نحن الأمة السودانية .

♫   ♫   ♫    ♫

دينار  يا  ابن  الغرب  ..

يا  رمز  التعايش

احكى  امجاد   الجدود...

لما  كان   الدين  تسامح ...

في  وطن  من  غير  حدود

قول  للطغاة  ما  القصة   لون...

القصة  قصة  وطن  ....

قد  يكون  أو  لا  يكون ...

في  غياب  الوطنية .

♫   ♫   ♫    ♫

عاشق  السودان  تكلم ...

وفك  شفرة  الصمت    اللعين

على  يا  ابن  الجنوب ...

يا   قائد   العشرين

احفادك   يمين... 

حافظين  وصية  .

♫   ♫    ♫    ♫

دقنة   يا  ود   الشرق

يا  رمز   الأصالة   والفداء

السودان  فيك  تجسد

وبلسم  الوطن   العطاء

مهر    الحرية  غالى

مهر   الحرية   الدماء ....

دماء  ذكية .

♫   ♫   ♫    ♫

المهدى  يا  أبو  السودان  ...  

عليك  الاف السلام

معذرة ... ابنك  السودان  تمرد..

شعلة  في  زمن  الظلام

ثورة  في  وجه  الظلم...

لعنة  في حكم  اللئام

ومن  لغتهم  العنجهية .

♫   ♫    ♫    ♫

فجرك طالع يا وطن ..

مهما طالوا الجبهجية

وتسقط رايات الانفصال

وتنتصر الأمة الأبية

زي ما كان في الاستقلال..

الوحدة جاية مية المية .

                       صلاح  مرسى          

                          الخرطوم  1999