أسكب دموعك يا قلم وأروى صفحات الالم
جاملنى في اليوم الصعـيب جاملنى يالله كفاك بلم
لو بتعرف مين بتبكـى كان مدادك بيبقى دم
الليلة غاب عنى الوجود اصبح يسـاويه العدم
الليلة لازمنى الانين وبقت حياتى بدون طعم
الليلة فارقت اعز زول الليلة فارقت احن ام
الليلة فارقت اعز زول الليلة فارقت احن ام
ما انسدت ينابيع الحنان وجفن مواعـيـن الكرم
يمة لو شفت القليــب ماليـاه صرخـات النـدم
العيــون فاضـن دمـــوع لماانقطع في الشوق عشم
كنت اعد في الثوانى كل يــوم فاضلى كـم
ارجع واشوفك مرة تانية والفرحة جواى تترسم
معاك في حضنك انوم كأنى في احسن حلم
لما احس رضاك لـي اقعــد جـوارك مبتسـم
وتجود على لمسة حنان وانسى كل هم وغم
اسمــع حكاويــك القديمــة اســاسها الدين والقيم
الصبـر والعفــو والسماح الطيبــة والخيــر والحلم
كنت ادعو الله كتير عمرى بيناتنا ينقسم
يديك من يداى يد ويديك من رجلى قدم
ويديك من عينى عين ويهبلك الروح والجسم
لكنى في لحظات لقيت مناى اصبح جد وهم
اه منك يا دنياى الديمة بتفرق ما تلم
اهة بتطلع منى نار تحرقنى جمرة بلا فحم
يمة الموت مصيركل زول ولابسنو زى عقد لغم
وين ابوى الكان حنين وين سوالفك وين يا عم
طابور طويل واقفنو دور الكل مسجل بالاسم
فيه الكبير سوا والصغير بس نجيب حسب الرقم
منو ما بينجينا واسطة ولا يحمينا عنو صلة رحم
يمة يوم جانا الخبر قدامنا الكون اتعتم
يبكيك بيتنا هناك كتير المنو عمودو انهدم
وحتى نيماتنا بكن عليك وحت اوراقها الوجم
من بكانا عليك شديد شاركننا الطير والبهم
يمة كان احسن اموت ولا يغشاك حتى هم
كل البلد حزنان عليك ناسو البعيد وناسو اللزم
وعيدنا بعدك ماهو عيد يومو بالحزن اتسم
وكيف يكون فيه الفرح وانتكس فيه العلم
دنيانا ما ارتحلت معاك والله يمة الدنيا أم
يا اخواتى اصبرن ودعنن ان شاء الله امنا تترحم
ما أظن لو ما صبرنا جرحنا النى يلتئم
مولاى احكم بى عفوك انت يا اعدل حكم
وخلى امنا في الجنان انت يا القاسم النعم
واجمعنا فى الفردوس كمان وكل شى منك قسم
7/2/2002
ليست هناك تعليقات:
إرسال تعليق